Ha Sambalö Mofozu ba Mowua Danömö si Sökhi andrö khö Lowalangi (Matai’o 13:24-30, 36-43)

Döladöla Huhuo ba Migu, 23-07-2017

Nifa’anö: Pdt. Alokasih Gulö, S.Th, M.Si

Amakhaita

Amaedola ilau Yesu ba zi sambua faza 13 andre ba wangombakha hewisa ia khilikhili mbanua Lowalangi andrö. Ba gamaedola si no tabaso mege oroma khöda wa i’o’amaedolagö mbanua Lowalangi andrö simane niha samazaewe tanömö si sökhi ba nowinia, ba so göi zamazaewe tanömö si lö sökhi ma tanömö ndru’u, ya’ia niha sifatiu tödö. Da’e zoroma khöda ba ayati 24-30. Lö abu dödöda wangalui eluaha gamaedola da’e, börö me no Ifo’eluaha samösa Yesu, da’e zoroma ba ayati 36-43. Ba tuho sebua sedöna ifaehagö Yesu ba gamaedola andre ya’ia zi so ba ayati 43a: “Ba humaga dania zatulö andrö, hulö luo, ba mbanua Namara andrö”. Ba gamakhaita da’e fefu ta’osisi’ö geluaha taroma li Lowalangi ba zi ma’ökhö andre.

Angosisila

Ambö fagöna na ta’osisi’ö gamaedola Yesu da’e ero sambua-sambua ayati (tafsiran ayat per ayat kurang tepat), börö me ha sambua amarahuta manö gamaedola da’e, ha sambua dölania hewa’ae oya ndraha si fakhai khönia. Andrö, mu’osambua’ö manö wangosisi’ö ya’ia (satu kesatuan), i’oroi gamaedola Yesu ba ayati 24-30, irugi geluaha gamaedola da’ö ba ayati 36-43.

No fakhilikhili ira iwa’ö Yesu mbanua Lowalangi andrö niha samazaewe tanömö si sökhi ba nowinia. Tatu no aboto ba dödöda wa niha si sökhi ba tanömö si sökhi göi nifazaewenia, gandru (gandum) döi zinanö andrö na tafaigi ba ba mbuku ni’amoni’ö ba li Indonesia (LAI), ba no tanömö si sökhi da’ö. Moguna sibai gandru andre ba ginötö Yesu, ba he göi fatua lö na so Yesu ba gulidanö, tobali soguna bongi ma’ökhö (kebutuhan sehari-hari, pangan). Auri sibai göi zinanö da’e ba danö si so Yesu ba ginötö da’ö. Andrö wa baga sibai wangoguna’ö Yesu gamaedola da’e ba wamahatö ba dödö niha samondrongo famahaö-Nia me lua da’ö hewisa ia mbanua Lowalangi andrö.

I’ombakha’ö Yesu ba ayati 37 wa niha samazaewe tanömö zinanö si sökhi andrö ya’ia Nono Niha. Ha niha nitötöi “Ono Niha” andrö? Yesu samösa nifotöi “Ono Niha” ba daroma li Lowalangi andre. Ya’ia zamazaewe tanömö zinanö si sökhi andrö, Ya’ia zanuriagö turia mbanua Lowalangi andrö (fahela Mat. 4:17, 23). Da’e halöwö sebua nifalua Yesu ba we’amöi-Nia ba gulidanö, manuriagö turia somuso dödö, turia mbanua Lowalangi, ba da’e danömö fondrege zi sökhi. Ba heza mufazaewe danömö si sökhi andrö? Ba nowinia iwa’ö ba gamaedola andre! Hadia geluaha da’e? Na ba mbuku ni’amoni’ö ba li niha, nowi andrö ya’ia “niha ba gulidanö” (ay. 38), na ba mbuku ni’amoni’ö ba li Indonesia ba he göi ba li ndrawa heleni, nowi andrö ya’ia “gulidanö” (dunia). Ba da’ö möi Yesu wamazaewe tanömö si sökhi ba gulidanö. Halöwö famazaewe andre tola fakhai dania ba halöwö fanuriagö banua Lowalangi ba soi niha ma’afefu (fahela Mat. 28:19).  Ba hadia danömö si sökhi andrö? Tanömö si sökhi andrö iwa’ö Yesu ya’ia “nono mbanua Lowalangi, anak-anak Kerajaan” (ay. 38). So zamo’eluaha wa dozi niha samati “nono mbanua” sedöna iwa’ö Yesu ba da’e, mufazaewe ira ena’ö tola omuso dödö zokhö ya’ira andrö dania na auri ira ba na ibasi mbuara si sökhi.

Ba hiza, simane si no tabaso sa’ae mege, wa so manö göi zifatiu tödö, samazewe tanömö ndru’u, ma na ba mbuku ni’amoni’ö ba li Indonesia iwa’ö “Lalang” (o’o). Afökha zi fatiu tödö andre iwa’ö Yesu (ay. 39), ifazaewe göi khönia danömö wa’alösökhinia, tanömö ndru’u (ay. 25, 38) ba gotalua danömö zinanö si sökhi no mege, ifaigi ginötö ba zi lö la’ila’ila niha. Ono gafökhö ndru’u da’e iwa’ö Yesu (ay. 38), tanömö si lö sökhi nifazaewe gafökhö, samasoli ya’ia ba gotalua danömö si sökhi. Lö oroma me lafazawili, lö oroma ba mböröta, andrö wa hulö zi tokea genoni zokhö samazaewe sinanö si sökhi no mege andrö me la’ia no göi oroma ndru’u si tenga nifazaewe zokhö ya’ira mege (ay. 27). Awena i’ombakha’ö khöra sokhö ya’ira wa halöwö zi fatiu tödö da’ö, halöwa gafökha (ay. 28, 39).

Hewa’ae omasi ena’ö ndra enoni andrö wondröni du’u andrö, ba lö itehe khöra sokhö ya’ira, imane khöra: “Böi, ma dania mifao wondröni sinanö, na mi’ozaragö ndru’u” (ay. 29). Awena aboto ba dödöda hadia geluaha wehede da’e khö Yesu me i’ombakha’ö wa so sa ginötönia dania, ya’ia na ba gamozua götö danö (akhir zaman, ay. 39), ba so göi zohalöwö gametahö da’ö dania, ya’ia ndra mala’ika Nono Niha no mege (ay. 41), ba wangozaragö zi no amaedola ndru’u no mege, ya’ia dozi niha solaulau fangala, samaelungu, samazökhi si lö atulö, awena latibo’ö ba mbaho galitö, ba fege’ege dania ba da’ö ba fatangisa mboha (ay. 42). Tatu tanömö si sökhi sauri no mege, sowua, si lö tekiko ba ndru’u, ba la’owuloi ba halasa khönia (ay. 30). Da’ö zalua ba niha samati, “humaga zatulö andrö, hulö luo, ba mbanua Namara andrö” (ay. 43a). Eluahania, ha sambalö auri zinanö si sökhi na atulö ia, hewa’ae oya ndru’u sanaisi fa’aurinia. Famangelama gamaedola da’e sindruhunia khö Yesu, wa ha sambalö itema mbua wa’alösökhinia niha ba luo safuria, ba ginötö wangawuli Yesu na manguhuku ia. Ba zitambai da’ö, fehede fangaro dödö zamati göi da’e khö-Nia ena’ö böi terahu ira ba zinanö si lö sökhi andrö dania ba ginötö wanguhuku.

Amarahuta

Ba gamaedola khilikhili mbanua Lowalangi andre, i’oroma’ö khöda Yesu wa lö zi lö ifasoli ia si lö sökhi ba gotalua zi sökhi andrö ba gulidane andre, ifaogö ia ba zi sökhi, asese lö oroma ia ba mböröta, ba hiza ba gamozua oroma sibai sa ia dania, ba halöwö zi lö sökhi andrö ha sambalö lö sökhi lualuania göi dania.

Andrö, hewa’ae oya manö ngawalö zi lö sökhi samasoli ya’ia ba gotalua zi sökhi andrö, oya ngawalö zanabigö ma somba’agö fa’atoharenia, ba edöna iwa’ö khöda Yesu wa banua Lowalangi andrö, ha sambalö auri ia, ha sambalö mowua ia, ha sambalö amohua ia, ha sambalö mozökhi ia, ba ha sambalö muhaga ia.

Angerönua

No ihalö halöwö-Nia Yesu wamazaewe tanömö fondrege zi sökhi ba gulidanö andre, ya’ia wanuriagö banua Lowalangi, ya’ia daroma li fangorifi soroi Lowalangida. Tola göi tafaduhu’ö wa tanömö zi sökhi andrö ya’ia dozi niha samati khö-Nia, sanörö lala wa’auri-Nia sifao fa’asökhi ba fa’atulö dödö. Omuso dödöda na itugu tedou wa’oya niha samati, owuawua dödöda na si to’ese sökhi gangowuloa mbanua niha Keriso, he bakha ba gosali (jemaat), ba mbanua misa (lingkungan), ba he göi ba zi sambua-sambua fongambatö. Idönadöna göi So’aya yaita Yesu Keriso wa tanömö si no Ifazaewe andrö tola mowa’a, auri, ba mowua sökhi ia dania, irege ibasi mbuania si sökhi andrö Yesu, i’ohe ira dania ba mbanua-Nia na mangawuli Ia wanguhuku ösi gulidanö. Tatu, me tanömö si sökhi nifazaewe Yesu, ba bua si sökhi göi lualuania dania. Moguna tabe’e ba dödöda da’e wa ha sambalö si sökhi zi’oroi Yesu Keriso, ba ha sambalö si sökhi göi dania nihalö-Nia tana khö-Nia.

Ba hiza, simane ba gamaedola Yesu no mege, ha göi sambalö so ndru’u ba gotalua zinanö si sökhi, andrö böi tokea sibai ita da’ö, böi mangaösö sibai dödöda wangai angetula khöra. No göi ihalö halöwönia afökha ba wamazaewe tanömö zinanö si lö sökhi khönia ba zi lö la’ila’ila niha, halöwö nibini’ö. Ba hiza, lawaö ba gamaedola nono-niha khöda: “Ibinibini’ö ia bawa na akhömita, oroma na tesa’a”. Simane da’ö halöwö gafökha, ibinibini’ö ba mböröta ba oroma manö sa dania ba gamozuania. Andrö no i’oroi ba mböröta da’ö wa ifasolisoli ia ono gafökhö ba gotalua nono mbanua Lowalangi, ifasulo ia halöwö gafökha ba gotalua halöwö si sökhi. Moguna mangelama mbanua niha Keriso!

Niha si lö sökhi zi no amaedola ndru’u ba wamahaö Yesu ma’ökhö andre, ba so ösa ira ba gotalua mbanua niha Keriso, ba gotalua zinanö Lowalangi si sökhi, arakha lö ta’ila tafaehuni ira ba mböröta, andrö wa asese göi ahani niha Keriso tanö bö’ö ba wamaelungura andrö. Asese tebai tataha dödöda wamaigimaigi niha si lö sökhi ba gotalua niha samati simane da’ö, omasi ita ena’ö na te’oroma’ö ba tefazaumba ira ba nahia si lö fa’auri, ba hiza lö sa alua ba ni’andrö’andrö dödöda. Böi abu sibai dödöda iwa’ö Yesu, so sa dania ginötö khö Lowalangi ihalö halöwö-Nia ba wamöfö’ö ya’ira, so sa dania genoni Lowalangi ba da’ö wangozaragö ya’ira wolohe ba nahia wanguhuku. Fanguhuku andre dania nitema dozi niha si no ifaelungu afökha, si no molo’ö omasiö dödönia, niha solohe fangala ba gotalua mbanua niha Keriso, niha solau si lö atulö. Iwa’ö Yesu khöra: “ba latibo’ö ba mbaho galitö andrö, ba fege’ege dania ba da’ö ba fatangisa mboha” (Mat. 13:42).

Afuriata, tuho sebua ba daroma li Lowalangi andre, ya’ia da’ö wa ha sambalö auri ba mowua sökhi danömö si sökhi khö Lowalangi andrö, hewa’ae oya zi no amaedola ndru’u sanaisi fa’aurinia. Simanö göi dozi niha samati satulö tödö, auri ba mowua ira ba gulidanö da’e hewa’ae oya zanaisi famatira, anau gölöra ba wamati khö Yesu, ba moroi ba niha samati simane da’e itugu monönö wa teboloso duria mbanua Lowalangi andrö. Tebai muba’agö halöwö Lowalangi ba wamasindro banua-Nia, ha sambalö mofozu halöwö Yesu Keriso ba danömö si sökhi andrö khö-Nia. “Ba humaga dania zatulö andrö, hulö luo, ba mbanua Namara andrö” (Mat. 13:43a).

Anunöwa

No halöwö si sökhi sibai halöwö nifalua Yesu we’amöi-Nia ba gulidanö, ya’ia wanuriagö turia mbanua Lowalangi, turia wangorifi ba niha fefu;

No i’oroi ba mböröta wa ilau göi halöwönia afökha ba wamaelungunia niha ba gulidanö, ba ato göi zifao khönia ba wa’elungu dödöra andrö, ba hiza fa’atekiko gamozuara;

Ha sambalö mofozu sökhi danömö si sökhi andrö khö Lowalangi, ya’ia niha samati khö-Nia sifao fa’atulö dödö, ha sambalö muhaga ira, ba omuso dödö Zokhö ya’ira ba khöra andrö.