Amuata Wa’omasi Niha Samati (Roma 12:9-21)

Lala Gera'era Huhuo ba Migu, 03-09-2017

Nifa’anö: Pdt. Alokasih Gulö, S.Th, M.Si

Amakhaita

“Amuata Wa’omasi” duho sebua ba daroma li Lowalangi andre. Ifaehagö nösi dödönia Faulo ba “gamuata wa’omasi” andre ba mbanua Roma, hewa’ae na ya’ia samösa lö aboto sibai ba dödönia hadia noro dödö mbanua niha Keriso ba Roma andre me lö na sa si möi ia ba da’ö me isura zura andre. I’andrö Faulo ba mbanua niha Keriso ba Roma ena’ö amuata wa’omasi sindruhu lafalua (Rom. 12:9, 10), irege tola tobali sumange Lowalangi wa’aurira (fahela Rom. 12:1), ba tola göi tobali sondrorogö fahasambuata zamati ira (fahela Rom. 12:4-8). Moroi ba gamuata wa’omasi sindruhu andre tola mozökhi wariawösa niha khö Lowalangi, niha ba khö nawönia niha, ba lala halöwö zamösana, ba ba zi sandrohu fa’auri. Da’e nizarara Waulo ba mbörö huhuo ma’ökhö andre irugi ayati 21.

Angosisila

Data’osisi’ö hewisa gamuata wa’omasi sedöna ifaehagö khöda Faulo ba mbörö huhuo andre, fa’omasi si lö tola lö oroma ba wa’auri mbanua niha Keriso.

(1)  Amuata Wa’omasi ba Nawö (Kasih kepada Sesama)

Hewisa zatulönia gamuata wangomasi’ö awö? Böi faruka wamini tödö iwa’ö Faulo (ay. 9). Eluahanua, fa’omasi satulö tenga fa’omasi sifalimo, böi hulö zangomasi’ö awö ba afönu si lö sökhi bakha ba dödö sa ba afönu si lö sökhi.  Hadia mbörö wa iwa’ö da’e Faulo? Börö me asese tesöndra niha ha ba mbawa no idölö, alösö dali zoroma ba hörö ba hiza no rederedeö bakha zindruhu nösinia.

I’ogorofi zi lö sökhi (ay. 9). Eluahania, niha si so fa’omasi satulö ba i’ogorofi wolau si lö sökhi, lö ilau zi lö sökhi khö nawönia, lö ilau zi lö sökhi gofu heza, lö eluaha si tobini na ilau wa’omasi simane si no muwa’ö moroi yawa no mege.

Ilau zi sökhi (ay. 9). Amuata wa’omasi andrö ya’ia wolau si sökhi, tenga si lö sökhi. Lö fefu wa’omasi ifalua zi sökhi, ha fa’omasi soroi dödö, fa’omasi satulö zangila molau si sökhi, börö me lö khönia famini tödö, lö falimosa.

Sifao fa’ahele ba fa’atulö dödö. Iwa’ö Faulo ba ayati 10 “fangomasi’ö talifusö andrö ba ya moroi ba dödömi”. Fehede “fangomasi’ö” ni’oguna’ö Waulo ba ayati 10 andre ba li ndrawa heleni ya’ia da’ö “philadelphia”, moroi ba wehede “philia” (fa’omasi yomo ba nomo, kasih dalam keluarga). Sedöna iwa’ö ba da’e ya’ia da’ö amuata wa’omasi da’ö ya hulö wa’omasi zatua khö nononia, fa’omasi soroi dödö zatua, lö idönadöna wa isulöni khönia ononia dania. Simanö wangomasi’ö awö iwa’ö Faulo, soroi ba dödö ba lö idönadöna zulö.

Faoma fahulö ba wamosumange awö (ay. 10). Niha Keriso böi simane sito’ölö ba ndrawa Roma ba ginötö da’ö, zara fahulö ena’ö ya’ira nifosumange. Niha Keriso fahulö wame’e sumange ba nawö, da’ö gamuata wa’omasi satulö.

Tobali howuhowu ba nawönia niha, he ba zifahuwu khönia ba he göi ba niha solohi ya’ia. Izarazara Faulo wanutunö hewisa gamuata niha Keriso simanö, itolo nawönia ba i’ila itema’ö dome (ay. 13), fao ia awö zomuso tödö ba sabu tödö (ay. 15), lö ilau mbalönia ba zamalua si lö sökhi khönia, ifahowu’ö ira a’ine (ay. 14, 17, 19-21). No tobali fa’ato’ölö ba mböröta wanolo awö, mendrua manö niha ni’amoni’ö, simanö göi ba wanema’ö tome (memberi tumpangan) börö me asese tesöndra niha sikoli meföna, ba sinangea mutolo ira, tome nifosumange. Hewisa göi gamuata wa’omasi si sökhi ba niha solohi banua niha Keriso? Lö moguna mangelifi iwa’ö Faulo, khö Lowalangi sa so wolau balö (ay. 19). Ba da’ö tekaoni niha Keriso ba wamahowu’ö (fahela 1 Fetero 3:9), tenga ba wangelifi. Simanö göi na so niha si falukha fa’omuso dödö, amuata wa’omasi ba da’ö ya’ia fao niha Keriso ba wa’omuso dödö andrö; na so zabu tödö ba fao niha Keriso ba wa’abu dödöra andrö.

(2)  Amuata Wa’omasi ba Lala Halöwö

Ifarou sibai dödö mbanua niha Keriso Faulo ena’ö böi atage ira ba wa’owölö’ölö, ena’ö atarö dödöra ba khö Zo’aya (ay. 11). Hadia geluahania? Ya’ia da’ö ba wangai halöwö si sökhi böi so wa’atage, böi ha mo’inötö wamalua ya’ia. So wehede niwaö ndra satua: “ha ba mböröta humöngöhöngö, ba gamozua taya manö”. Asese lawa’ö wehede da’e ba niha sowölö’ölö ba mböröta ba hiza itugu ara itugu lö sa’ae oroma wa’owölö’ölö da’ö. Niha si so ba wa’omasi satulö ba lö fa’awuwunia wolau halöwö si sökhi, lö fa’awuwunia wamalua si sökhi, hewa’ae fataria falukha ngawalö wamakao, ba hiza i’omusomusoi’ö manö dödönia ba khö Zo’aya (ay. 12). Hana wa iwa’ö sibai wehede da’e Faulo? Börö me asese so wolohi niha Keriso, ba tola manö tesöndra wa’awuwu wolau si sökhi ma ba wangai halöwö zamösana na tebai lataha sa’ae wolohi awö wamakao andrö. Andrö wa ifadaridari’ö wehede Faulo ena’ö böi so wa’atage he na asese hulö zi lö böli gölö ira wohalöwö, böi so wa’awuwu ba wangai halöwö zamösana, ena’ö so wa’atarö dödö ba khö Zo’aya. Awai zi tola mamalua niwa’ö Waulo andre ha niha si no mowa’a ba wa’omasi sindruhu, sokhö fa’omasi si lö falimosa.

Amarahuta

Amuata wa’omasi niha samati sedöna ifaehagö khöda Faulo ba mbörö huhuo andre modanedane moroi ba wa’omasi si no ifa’ele’ö So’aya ya’ita Yesu Keriso, lö irai idönadöna zulö moroi ba niha, me moroi ba wa’ahele dödö-Nia wamalua fa’omasi andrö. Simanö göi gamuata wa’omasi niha samati ena’ö sindruhundruhu mowa’a ia ba wa’omasida Lowalangi ba ba wangomasi’ö awöda niha, he sifahuwu khöda ba he göi dozi solohi dozi samati.

So wa’auri ba fa’ohahau dödö ba niha sangila mango’aurifagö amuata wa’omasi niha samati si sökhi andre, mozökhi wa’auri, moadu göi wa’aurinia, sökhi gamakhaitania ba nawönia niha, owölö’ölö wangai halöwönia zamösana, ba i’omusomusoi’ö manö dödönia wanörö fekolinia ba gulidanö, he ba wa’omuso dödö ba he göi ba wa’oya noro dödö. Da’ö gamuata wa’omasi niha samati khö Yesu.

Angerönua

Lö tokea ita wamondrongo fehede “fa’omasi”, börö me da’ö sambua duho sebua wamahaö khöda ya’ita niha Keriso. Ba gulidanö da’e, ha ba niha Keriso tesöndra wamahaö sabölö sökhi gametahö “wa’omasi”, ba oi dozi ta’ila da’ö. Wa’oya göi zinunöda he ba li nono niha khöda ba he ba li ndrawa, ösinia “fa’omasi”, ba wa’omasida wo’anunöisi ya’ia. Anofulada iada’e, hadia obönö maö na no ta’ila “wa’omasi” andrö simane nifahafahaö ya’ita barö da’e? Hadia obönö maö na asese tafadunödunö ia? Ma hewisa?

I’ila Faulo wa no oi ta’ila nifotöi “fa’omasi” andrö, no si sökhi sibai sa wamahaö da’ö khöda, ba hiza moguna a’ine aboto ba dödöda wa tenga ha ndrege wangi’ila, lö tolö lö ta’o’aurifagö ia. Da’ö mbörö wa izarazara khöda wanutunö mege hewisa ia gamuata wa’omasi niha Keriso andrö.

Siföföna, faudu da’e ba wamahaö Yesu, wa moguna ta’omasi’ö nawöda simane fangomasi’öda ya’ita samösa. Ba hiza, amuata wa’omasi satulö ya’ia na mufalua ia moroi sibai ba dödö, sifao fa’ahele ba fa’atulö dödö, lö fawinisa tödö. Asese falukha ita niha Keriso salösö sibai na fahuhuo, hulö zangata’ufi Lowalangi ira tawa’ö, ba hiza ba wa’alösö huhuora göi lalaugö tou nawöra. Fataria ta’ila niha oi taroma li Lowalangi manö na fahuhuo, ifalua göi wa’omasi ba nawö, ba hiza so göi khönia dödö si tobini ba zitambai da’ö fefu, so geluaha tanö bö’ö wa ifalua wa’omasi andrö. Hana wa tola simane da’ö? Börö me famaluania fa’omasi tenga si’oroi ba dödönia. Simanö göi oya nasa tesöndra ba gotalua mbanua niha Keriso samalua fa’omasi ba hiza idönadöna wa lasulöni khönia dania, hulö na no tabe’e zumange niha ba walöwa khöda dumadumania, tadönadöna wa iakoni göi ita dania na so khönia walöwa ba ibe’e zumangeda. Tenga simane da’e gamuata wa’omasi niha samati khö Yesu, samuza tö lö idödöda zulö, börö me si’oroi dödönia wamalua fa’omasi andrö, lö sifaruka wamini tödö, lö göi fao walimosa.

So wa’anau gölö ba niha si so fa’omasi sindruhu, anau gölönia wangomasi’ö awönia niha, he sifahuwu khönia, he sawena falukha khönia, he tomenia, he sifatambai omo khönia, he talifusönia, ba he göi niha solohi ma samakao ya’ia. Fagölögölö manö gamuata wa’omasi nifa’ele’önia khöra, tobali ia dela howuhowu ba niha fefu, tenga dela wangelifi, tenga börö mbukala, tenga solaulau balö ba zi lö sökhi, ba tenga göi somuso tödö na abu dödönawönia.

Simanö göi ba lala halöwönia, i’oroma’ö gamuata wangomasi’öia halöwö andrö, gofu hadia ia zalua, me aboto ba dödönia wa lö tobali zayazaya gölö dania wa’erege dödönia ba zi sökhi andrö. Niha sango’amuatagö fa’omasi sindruhu so khönia wa’anau gölö wamalua si sökhi khö nawönia, so wa’anau gölö wamalua si sökhi yomo ba nomo, so wa’anau gölö wamalua si sökhi ba mbanua si so ya’ia, ba so wa’anau gölö wamalua halöwö si sökhi. Simanö gamuata wa’omasi niha samati khö Zo’aya ya’ita Yesu Keriso.

Anunöwa

Famaluada fa’omasi modanedane ba wa’omasi si no ifalua So’aya ya’ita Yesu Keriso, fa’omasi sindruhu soroi ba dödö;

Amuata wa’omasi niha samati mufalua ia ba nawöda niha, ba mu’oroma’ö ia göi ba lala halöwö bongi ma’ökhö;

Dozi niha samati tekaoni tobali howuhowu ba zi tefasui, i’ila ihalö halöwö-Nia sa’ae Lowalangi ba zi tebai ikhamö fa’abölöda wamalua, fao bakha ba da’ö dozi solohi niha samati khö Yesu;

So wa’anau gölöda wamalua hadia ia fefu zi sökhi na no mowa’a ba wa’aurida gamuata fa’omasi sindruhu.