Kain dan Habel (Kej. 4:1-5)

Ka’ino ba Habeli (1 Moze 4:1-5)

Darua zifatalifusö ono Gadamo-Khawa, ya’ia Ga’ino ba Habeli. Me no ebua ira ba mohalöwö: manguri biribiri Habeli, ba sangahalö ma sohalöwö ba danö Ga’ino. Da’ö lala halöwö ba ginötö meföna, so göi ösa zialu simane Ezau. Ba no göi to’ölö niha ba ginötö meföna wolohe sumange Lowalangi mbua wangahalö, he fo’urifö he göi fohalöwö ba danö. Da’ö nifalua Habeli ba Ka’ino.

Ibe’e zumange Yehowa Ka’ino, bua nowi khönia. Simanö göi Habeli, ihalö nono gurifönia sia’a, sotawö, ibe’e sumange Yehowa. Faoma labe’e zumange khö Yehowa dali zi so khöra molo’ö lala halöwöra. Lö sala da’e, da’ö zifagöna, na ibe’e niha zumange khö Yehowa ndrege wa’abölö zamösana. Ba hiza, hadia zalua? Hewisa Yehowa ba zumange andrö nibe’e khö-Nia? Hadia fagöna ba dödö Yehowa zumange zi darua andrö?

Ba nibasoda no mege oroma khöda wa omasi Yehowa zumange nibe’e Habeli, ba lö omasi Ia zumange nibe’e Ga’ino. Da’e dania mbörö wa mofönu sibai Ga’ino, abao mbawania (ay. 5), ba lualuania dania ibunu nakhinia Habeli (1 Moze 4:8).

Hana wa lö omasi Yehowa zumange nibe’e Ga’ino ba omasi sa Ia nibe’e Habeli? Na tafaigi ba zura Heberaio 11:4, oroma khöda ba da’ö hana wa sumange Habeli nitema ba tenga khö Ga’ino. Imane ba zura Heberai’o: “Moroi ba wamati wa no sökhi zumange andrö nibe’e Habeli khö Lowalangi moroi ba nibe’e Ga’ino, ba moroi ba da’ö tefaduhu’ö ia wa satulö ia, me ifaduhu’ö game’elania Lowalangi, ba moroi ba da’ö göi wa muhede ia na, hewa’ae no mate ia” (Heberaio 11:4). Ibe’e zumange khö Yehowa Habeli sodanedane ba wamati sindruhu, si’oroi dödönia wame’e, fangandrö saohagölönia khö Lowalangi ba mbuala si no itema, sumange fasömbata soroi dödö. Tenga da’ö nifalua Ga’ino, ibe’e sa zumange khö Yehowa, ba hiza tenga sodanedane ba wamati sindruhu; ibe’e zumange khö Yehowa sifao fa’aniha. Oroma dania khöda me lö omasi Yehowa nibe’enia ba mofönu ba abao mbawania. Na soroi dödönia ma na sahele dödönia mena wame’e sumange, ba i’owuawua’ö dödönia wolohe sumange Yehowa. Ba hiza tenga da’ö zalua, ibe’e zumange khö Yehowa Ka’ino ba wa’anihania, ba lö itema Lowalangi zumange simane da’ö.

No göi to’ölö ita irugi ma’ökhö andre wolohelohe sumange khö Lowalangi. So zame’e bua zinanö, so zame’e urifö, so zame’e kefe, ba so göi zame’e “bahan untuk pembangunan”, ba tanö bö’önia nasa. Baga wolohe sumange khö Lowalangi. Ba hiza moguna aboto sibai ba dödöda wa lö tola lö tafodanedane ba wamati sindruhu wame’eda sumange khö Lowalangi, ba tola tobali howuhowu khöda dania. Tenga dali wa’ebua, tenga dali wa’ide’ide, hiza ine sodanedane ba wamati sindruhu, sahele dödöda. Böi tabe’e zumange khö Lowalangi na so geluaha tanö bö’ö sedöna dödöda, ma na so gohitö dödöda ba wa’aniha. Lö moguna tabe’e “sumbangan” khö Lowalangi, börö me lö mo’amböta Ia. Solohe fasömbata ita, sumange fangalulu tanö föna Lowalangi, tenga solohe “sumbangan” khö-Nia.

Baero da’ö, moroi ba da’e göi ibörögö ifa’ele’ö khöda taroma li Lowalangi, wa itema zumange nibe’e Habeli, ono mbiribiri sia’a, me dania tohare Yesu, Ono mbiribiri sindruhu andrö khö Lowalangi (faigi Yohane 1:29). Moguna aboto ba dödöda da’e, wa Yesu andrö no Ono mbiribiri khö Lowalangi, sangeheta horöda fefu. Moroi ba da’ö mangalulu ita khö-Nia, ta’ohe zumange sifao fangidengide’ö.